السلام عليكم يا دكاترة – بعد ثورة شعب عظيم مش لازم أبدا يكون الخيار الأول للصيدلي أول ما يتخرج إنه يفتح صيدلية ، لأن عندنا بالفعل 60000 صيدلية ف مصر تكفي وتزيد. طب إيه البديل ؟ سألتني بقي إيه البديل ، أكيد فكرت إنك صيدلي وكيميائي أساسا ، فمش معقول تخلي مشروعات لازم تبقي بتاعة الصيادلة، وناس تانية تعملها بدالك ، لأ وإيه تكلفتها ف معظم الأحوال أقل من تكلفة تأسيس صيدلية!! يعني مثلا مين فينا فكر إنه يفتح مشروع تقطير واستخلاص زيوت عطرية ثابتة وطيارة ؟ عارفين فيه عجز أد إيه ف مصر والعالم العربي في الزيوت والمستخلصات ، وتعرف إنك ممكن تشتغل ع التصدير لدولة واحدة أو العمل للسوق المحلي لمحافظة واحدة وما تقدرش تكفيها احتياجاتها م الأطنان المطلوبة؟ لأ وتعرف إن تكلفة المشروع الأولية لا تزيد عن 50 ألف جنيه مكن وأقل من نصهم خامات؟!! طب بلاش دي ، حد فكر يعمل أكياس المياه بتاعة المضاد الحيوي الشرب ، تكلفة المشروع زي اللي فوقه تقريبا ، وفيه عجز دائم ف السوق المصرية ليها ؟!! ، طب حد حاول يعمل فكرة مفيش أسهل منها ف تصنيع الشنط البلاستيك ؟ وده مشروع مش كيميائي ولا دوائي لكن يتعمل بأقل تكلفة ويدر أعلي ربحية؟!! ، بلاش كل ده، حد فكر ف تصنيع الكحول الإيثيلي من المولاس أو م الورق أو السكريات؟؟ وأكيد نعرف زيادة الطلب المصري والعالمي ع الكحول الإيثيلي عشان ابتدوا يخلطوه بالبنزين للعربيات بنسب بتزيد كل سنة؟ وحد عارف إن مكسب المشروع 150% ع الأقل ودورته 3 شهور ، وتكلفته برضه مش كبيرة؟ ، طب حتي عاوز تصنع مستحضرات مصرية تحد شوية م الاستيراد ، تشتغل فيها لو ليك ف الدعاية ومالكش ف التصنيع ووجع الدماغ ، طب ليه ما تعملش كده ، برضه أرخص م الصيدلية!! احنا عشان كده يا دكاترة عملنا مبادرة مصرية –يمكن مش خاصة بالصيادلة بس – بس بصفتي منهم كان لازم يكون منتدانا أول مكان لنشر المبادرة ، اسمها مبادرة مصر معاك ، لتشجيع الصناعات المتناهية الصغر والصغيرة والمتوسطة علي مستوي الجمهورية ، وبنقدم فيها الدعم الفني ، وكمان دراسات الجدوي ، وحلول فنية وتمويلية وأفكار لمشروعات صغيرة للشباب ، مع دراسة تسويقية وتوجيه لصاحب المشروع للسوق الملائم لسلعه المنتجة ، يا تري مين معانا يا صيادلة ؟؟ اللي عاوز يشارك بعلم أو خبرة أو تسويق أو إدارة أو طالب يبدأمشروع أو إنتاج ياريت يتواصل معانا ، واحنا مؤمنين ،بأمر الله ،إن المبادرة حتتحول لمبادرة عربية شاملة للمشروعات الصغيرة علي مستوي العالم العربي ، برجاء التواصل معنا علي هذا المنتدي أو ع الهوتميل أو علي زيرو مائة ستة اثنان زيرو ثلاثة تسعة اثنان وعشرون سواء اللي عاوز يكون معانا ف المبادرة أو طالب فكرة أو مساعدة فنية أو دراسة جدوي لمشروع ، وشعارنا جميعا : مصر معاك
13-05-2012, 08:26 PM
عشان نصنع أجهزتنا بنفسنا ، صنع وماركة مصرية
رد: عشان نصنع أجهزتنا بنفسنا ، صنع وماركة مصرية
