==: ملتقى طلبة وطالبات صيدلة المنيا :==

[نجم المنيا]

انا شايف ان ناس كتير بتسال على سنه اولى اولا لازم تعرفوا ان سنه اولى مختلفه اختلافا كليا عن اعدادى بصوا هى سنه اولى طبعا اصعب شويه من اعدادى والمواد مختلفه وملهاش ادنى صله بالحاجات اللى انت خدتها فى اعدادى بس فعلا من اول سنه اولى هتحس فعلا انك فى صيدله وهتلاقى معامله جديده خالص غير علوم واللى بيعملوه فينا واحب اقولكوا اهتموا بسنه اولى من الترم الاول وحاول على قد ما تقدر تلم درجات فى المواد اللى هى فى الترم الاول بتبقى عباره عن مقدمه للمنهج اللى هيستمر معك لحد ما تطلع من الكليه والمواد كلها ان شاء الله ربنا يسهل هحاول اقولهكم واشرح ظروف كل ماده ونظامه والدكاتره وكده اول قسم احب ابدا بيه هو
(1) قسم الكيمياء الطبيه
القسم ده من اهم الاقسام فى الكليه وهيستمر معاك من سنه اولى لسنه رابعه هتدرسوا فيه كيمياء عضويه فى سنه اولى وتانيه وكيمياء طبيه فى سنه تالته ورابعه ماده الكيمياء العضويه نفسها مش سهله لكن احلى حاجه ان دكاتره القسم كويسين جدا وبيجيبوا امتحانات كويسه بالنسبه لسنه اولى هتاخد فيها بعض التفاعلات الكيمائيه اللى هى مش معقده اوى واهم حاجه الميكانيزم بتاع التفاعل وده فعلا محتاج انك تحضر المحاضرات لان موضوع الميكانزم ده لازم تفهم فيه التفاعل ماشى ازاى والعملى بتاع العضويه فعلا سهل وممتع وهتحبوه جدا وسهل تجيب درجه حلوه فى العملى وبالنسبه لدكاتره القسم هم
(1) د\ عمر سكر
(2) د\ محمد عبدالعزيز
(3) د\ جمال الدين ابو رحمه
(4) د\ محمد فؤاد
واحيانا بيعملوا انتداب للدكتور علاء عبدالحفيظ من علوم عشان يدى سنه اولى بس ده مش بيحصل كتير لكن متقلقوش كل الدكاتره دول والمعيدين كمان خصوصا دكتور جمال عبد التواب افتكروا الاسم ده كويس لان ده هوه فعلا عبقرى القسم وهيساعدكم فى اى حاجه مش فاهمنها كلهم كويسين جدا وامتحاناتهم كويسه جدا










واخيرا درجات الماده دى كالاتى الماده من 300 مقسمه على ترمين 150 فى الترم الاول و150 فى الترم التانى وال150 درجه بتاعه كل قسم مقسمه كالاتى 80 للامتحان النظرى و40 للعملى و30 للشفوى وطبعا انا عارف ان الشفوى ده هيبقى جديد عليكم لكن متقلقوش بالعكس ده بيرفع من درجاتك لان اغلب الدكاتره بيدوا درجات كويسه للطلبه وانا اسف لو كنت طولت عليكم وان شاء الله هكمل معاكم باقى مواد سنه اولى وبعد كده هبتدى فى سنه تانيه كمان للناس اللى بتسال عن سنه تانيه وكل عام وانتم بخير

[نجم المنيا]

بالنسبه بقى لسؤال د\ وزه عن اتحاد الطلاب وازاى تقدر تنضم ليه انا هتكلم عن تجربه شخصيه لانى كنت ماسك امين اللجنه الرياضيه فى اتحاد الكليه وامين مساعد اللجنه الرياضيه فى اتحاد الجامعه اول حاجه عشان تدخل الاتحاد انك لازم تبقى طالبه نشاط يعنى يكون اسمك مسجل فى رعايه الطلاب فى اى نشاط تحبى تشتركى فيه سواء فنى او اجتماعى او رياضى او علمى او ثقافى وبعد كده ترشحى نفسك فى نفس اللجنه اللى نشاطك فيها فى الميعاد المحدد للترشيح وبعد كده تحصل الانتخابات عادى وطلاب النشاط فقط هما اللى ليهم حق التصويت فى الانتخابات دى كل مجموعه بتنتخب فى لجنتها وبعد ما ينتخب امين وامين مساعد بتاع كل لجنه بيترشح ناس منهم عشان منصب امين وامين مساعد الكليه بس هنا بقى اللى بيبقى ليهم حق التصويت هما ال14 عضو بس اللى نجحوا فى الانتخابات الاولى للجان ودى كمان نبذه مختصره عن اهداف الاتحاد وشروط الترشيح ودور كل لجنه فى الاتحاد اما بقى بالنسبه لاتحاد الجامعه ده حوار تانى خالص لو عايزانى اشرحهولك برده قوليلى وانا تحت امرك

الهدف من الاتحاد :-

1. تنمية القيم الروحية والاخلاقية والوعى الوطنى بين الطلاب

2. التعود على القيادة

3. إتاحة الفرصة للطلاب للتعبير المسئول عن أرائهم

4. توثيق الروابط بين الطلاب وأعضاء هيئة التدريس والعاملين

5. اكتساب المواهب والقدرات والمهارات وصقلها وتشجيعها

6. نشر وتنظيم الانشطة المختلفة وتشجيع المتفوقين

7. تنظيم طاقات الطلاب فى خدمة المجتمع بما يعود على الوطن بالخير

وشروط من يتقدم للترشيح لعضوية اللجان مجلس الاتحاد:-

1. أن يكون متمتعا بجنسية جمهورية مصر العربية

2. أن يكون طالبا مستجدا فى فرقته غير باق للاعادة فيها لاى سبب

3. أن يكون مسددا لرسوم الاتحاد

4. أن يكون من ذوى النشاط الملحوظ فى مجال عمل اللجنة المرشح لها

5. ألا يكون قد سبق الحكم عليه بعقوبة مقيد للحرية أو تقرر إسقاط أو وقف عضويته بأحد الاتحادات الطلابية أو لجانها

يعمل الاتحاد من خلال اللجان الاتية :-

1. لجنة الاسر

2. لجنة النشاط الرياضى

3. لجنة النشاط الثقافى

4. لجنة النشاط الفنى

5. الجوالة والخدمة العامة

6. لجنة النشاط الاجتماعى والرحلات

7. لجنه البحث العلمى

أولا :- لجنة الاسر والاتحادات :-

** تختص لجنة الاسر بما يأتى :-

1. تشجيع تكوين الاسر بالكلية ودعم نشاطها

2. التنسيق بين نشاط الاسر المختلفة بالكلية

ثانيا :- اللجنة الرياضية :-

**تختص لجنة النشاط الرياضى بمايأتى :-

1. بث روح الرياضة بين الطلاب وتشجبع المواهب والعمل على تنميتها

2. تنظيم النشاط الرياضى بالكلية بما فى ذلك تكوين الفرق الرياضية وإقامة المباريات والمسابقات والحفلات والمهرجانات الرياضية

ثالثا :- اللجنة الثقافية :-

** تختص لجنة النشاط الثقافى بما يأتى :-

1. تنظيم أوجه النشاط الثقافى والتى تؤدى الى تعريف الطالب بخصائص المجتمع وإحتياجات تطوره

2. العمل على تنمية الطاقات الادبية والثقافية للطلاب

رابعا :- اللجنة الفنية :-

** تختص لجنة النشاط الفنى بما يأتى :-

1. تنمية المواهب الفنية للطلاب والعمل على إتاحة الفرصة للطلاب لابراز مواهبهم ورفع مستوى إنتاجهم الفنى

خامسا :- لجنة الجوالة والخدمة العامة :-

** تختص لجنة الجوالة والخدمة العامة بما يأتى :-

1- تنظيم أوجه النشاط على الاسس السليمة وفقا لمبادئها

2-تنفيذ برامج خدمة البيئة التى يوفرها مجلس الكلية والاقسام بما يساهم فى تنمية المجتمع والعمل على إشتراك الطلاب فى تنفيذها والمساهمة فى مشروعات الخدمة العامة والقومية التى تتطلبها احتياجات الوطن

سادسا :- اللجنة الاجتماعية والرحلات :-

** تختص لجنة النشاط الاجتماعى والرحلات بما يأتى :-

1- العمل على تنمية الروابط الاجتماعية بين الطلاب وأعضاء هيئة التدريس والعاملين – وإشاعة روح التعاون والاخاء بينهم وبث الروح الجماعية فيهم وذلك بكل الوسائل المناسبة

2- تنظيم الرحلات والمعسكرات الاجتماعية والثقافية والترويحية التى تساعد على التعرف على معالم الوطن

سابعا : لجنه النشاط العلمى :-

تختص لجنه النشاط العلمى بما ياتى :

(1) تنظيم الندوات العلميه المختلفه والعمل على تشجيع الطلاب للدخول والاشتراك فى نادى العلوم

(2) عمل مسابقات بين الطلاب فى البحوث العلميه والعمل على تشجيع البحوث المفيده منها

وكل سنه وانتم طيبين يا دكاتره المنيا وبخصوص تاجيل الدراسه اللى انا كتبته فى تعليق سابق اكيد اتاكدته منه ان فعلا الدراسه اتاجلت حتى 3 اكتوبر عشان الناس بس اللى طالبين مصدر المعلومه انا كنت جبتها من المصرى اليوم بتاريخ 10 سبتمبر

[weza]

شكرا يا نجم ع المعلومات الكتيرة دى وانا فعلا نشاط رياضى ف الكلية واتمنى ادخل اتحاد الطلاب السنة دى
بس نفسى اكون ف نشاط الاسر انا من زمان نفسى اعمل اسرة او حتى اشترك فيها بس انا ماسمعتش
عن اسر ف كليتنا للاسف

[drfatma]

شكرا يا نجم المنيا على مجهودك ....مستنين شرح باقى المواد
كل سنه وانت طيب

[نجم المنيا]

تانى قسم هنتكلم عنه هو قسم الصيدلانيات والقسم ده برده مستمر معاكم من سنه اولى لسنه رابعه والمنهج بتاع سنه اولى سهل جدا بس المشكله بتبقى فى الامتحان وخصوصا لو ادى الماده د/ خالد لانه فعلا بيجيب الغاز ومسائل ملهاش حل لانى مش هانسى موقف حصل مع دفعتى انه جاب مسئله ومحدش عرف يحلها حتى المعيدين وبعدين رحنا للدكتور نفسه قال انا نفسى مش عارف حلها شوف وصلت لايه ههههههه بس برده احب اطمنكم انه بيديكم برده معاه د/ حاتم وده دكتور كويس جدا وامتحانه سهل جدا جدا وهتاخدوا فى الماده دى الطرق المختلفه لعمل المستحضرات الصيدليه اللى بتشوفوها فى الصيدليه وهتاخدوا كمان جزء بالعربى عن تاريخ الصيدله وده سهل جدا اما العملى بقى فهو فعلا امتع عملى هتستمتع بيه لانك هتبدا تعمل المستحضرات الصيدليه دى بايديك فى المعمل زى الفوار واالاقراص وغيره كتير على مدار الاربع سنين اللى بعد كده والمعيدين بتوع القسم بجد كويسين جدا وبيشرحولك منهج العملى بطريقه مبسطه وسهله انا الحاجه اللى لازم انصحوهلكم انكم اهتموا جدا بالقوانين والمسائل والرسم البيانى بتاع منهج الدكتور خالد لان الامتحان كله بيبقى منه لكن النظرى بتاعه بيبقى قليل اوى فى الامتحان والمذاكره بتاعته بتبقى من المحاضرات اما بقى دكاتره القسم ده هم
(1) د/ خالد على خالد
(2) د/ حاتم عبد المنصف
(3) د/ أمل محمد
(4) د/ اسامه فرغلى
(5) د/ اسامه عبدالحكيم
والماده دى برده على ترمين من 300 مقسمه 150 ترم اول و150 ترم تانى مقسمين على 80 نظرى و40 عملى و30 شفوى والنجاح بيقى من 60% يعنى 180 من 300 لكن ان شاء الله ربنا يوفقكم فيها وتجيبوا كلكم امتياز فيها ان شاء الله يلا بقى عايزين ايه القسم والماده الجايه انا مستنى ردودكم ومستنى لو حد عنده اى تعديل او اى استفسار عن اى حاجه تانى

[نجم المنيا]

ممكن اعرف يا وزه انتى كنتى مشتركه فى ايه فى النشاط الرياضى السنه اللى فاتت يعنى كنتى بتلعبى ايه لانى اساسا كنت دايخ على بنات السنه اللى فاتت عشان المشاركه فى الانشطه الرياضيه بتاع الجامعه واتمنى ليكى التوفيق لو فعلا قررتى انك هتجربى تدخلى الانتخابات وبالنسبه للاسر فعلا الكليه يعتبر اديها حوالى 3 سنين من غير اسر فعليه وليها نشاط لكن بيبقى فى اسره او اتنين كل سنه لازم بس بتبقى صوريه بس يعنى ملهاش نشاط يلا شدى حيلك انتى بقى بحماسك الجميل ده واعملى الاسره اللى انتى عاوزاها وكل سنه وانتى طيبه

[roroo]

كل سنه وانتوا طيبين يا صيادله المنيا
واتمنى تكونوا استفادوا بالشهر الكريم
ويا ترى جبتوا لبس العيد ولا لسه

[نسمة هوا]

السلام عليكم و رحمة الله و بركاته ازيكم يا دكاترة انا طالبة جديدة في صيدلة المنيا يعني لسه

داخلة اعدادي و لما روحت الكلية قالولي ان في حاجة جديدة اللي هيا الصيدلة الاكلينيكية فأنا دلوقتي محتارة مش عارفة ادخل

عادي و لا اكلينيكي عشان كده كنت حابة استفسر منكم عن القسم ده هل يا ترى الخريج منه بيتساوى مع خريج صيدلة عادية

اللي واخد دبلو م اكلينيكي و هل خريج اكلينكي ممكن يفتح صيدلية و يشتغل كل اللي بيشتغله خريج صيدلة عادية و لا ايه و ايه

الفرق الاساسي بين دراسة صيدلة عادية و اكلينيكية؟هما قالولي في الكلية ان انا ممكن اخد اعداي صيدلة و بعد كده احول

اكلينيكي اللي هوا 5 سنين طب لو عملت كده تضيع عليا سنة اعدادي دي يعني هقعد فى الكلية 6 سنين و لا ايه و كمان

بيقولوا ان الدكاترة بيسقطوا الطلبة عن عمد عشان الفلوس و ان اللي بيسقط في كورس بيعيدوا بفلوس طبعا و كمان سمعت

ان خريجي الاكلينيكي مبيشتغلوش في مجالهم يعني مالهومش مجال في الشغل غير مستشفى السرطان و دار الفؤاد هل

الكلام ده صحيح ؟ يا ريت تردوا عليا في اسرع وقت ممكن لان انا محتارة جدا و معنديش المعلومات اللي على اساسها هاختار و

انا اسفة جدا انى طولت عليكم

[Dr.Rahma]

اشكرك جدا ياد.عمرو على مساعدتك وردك على استفساراتنا......وكنت عاوزة اسال حضرتك على ميعاد نزول كتب سنة اولى فى الكلية ...هل بتتاخر

[drfatma]

شكرا جدا يا دكتور نجم المنيا على معلوماتك القيمه جزاك الله عنا كل خير
احب ان تكون الماده الجايه الكيماء التحليليه لانى سمعت ان العملى بتاعها صعب ايه راى حضرتك ؟
اتمنى لو تضيف بعد شرح اللى هاندرسوا فى كل ماده الطريقه المثلى لمذاكرتها ...الكتب اللى المفروض نشتريها ....اسلوب الامتحانات
معلش عندى سؤال اخير يا ترى احتمال ان د/خالد يدينا الصيدلانيات كبير ؟
كل سنه وانت طيب